يالله يامجري تصاريف الأفلاك
يارب يامحيي الديار المحيله
أنت الكريم وكل خلقك ترجاك
نطلبك جودك يامنجي دخيله
يافارج الشدات بالضيق ننصاك
عليك تخفيف الحمول الثقيله
ماخاب مخلوق لجا لك وناداك
من لا رحمته ياالولي عزتي له
ياالعبد لاتشكي على غير مولاك
مايجدي المخلوق لو تشتكي له
لو تشتكي للعبد ماثاب شكواك
ماله على حل المصاعب وسيله
لاصار ماتقضي لزومك بيمناك
مقسوم رزقك ماتحوشه بحيله
لاتحتمل معروف هذا ولا ذاك
لو قل مالك والموارد قليله
لاشك نفسك عزها عن دناياك
والرزق خلاق الخلايق كفيله
ولا تلتهي بالمال والموت يقفاك
العمر يفنا بين يومٍ وليله
تسير بك سمر الليالي لمثواك
ومن طول المنزل لزومٍ رحيله
لابد من يومٍ عذاراك تنعاك
ولابد ما ينقال هيا نشيله
مافيه بالدنيا مواطن وملاك
كلاً يسير وعابرٍ في سبيله
وكانك تحسب انك مخلد بدنياك
فكر وناظر وين جدك وجيله
واسمع كلام اللي على الخير وصاك
قوله يحثك للشرف والفضيله
يرشدك لدروب المكارم وينهاك
عن موقعٍ فيه الدنس والرذيله
وعن صحبة الهلباج واللاش حذراك
من صاحب الخايب يحطه زميله
قرين سو ابليس مغويه وأغواك
عميل شر ولا يربح عميله
عزاه لك من خوته كان خاواك
يرميك بدروب الردا والفشيله
عليك باللي للشرابيك فكاك
قرم ليا حدك لزومك تجي له
لا جيب علم الطيب ينقال شرواك
يرقا درج ممشا الخصال النبيله
والا الردي لوهو ولد عم يجفاك
ورايه بعد مايستشير الحليله
وش عاد لو تقضي لزومه ليا جاك
تجهد عليه وفوق راسك تشيله
اليا قضى بك حاجته راح يشناك
وغيرك عمل به طيب وانكر جميله
اليا بداله لازم جاك ينخاك
وان صار عنده حاجتك بان ميله
مدحك يغيضه كان به جيب طرياك
وعليك يفرح بالخزا والخذيله
ضميره اسود والحسد سم فتاك
اليا سمع مدحك تزاود غليله
قصده يغار ولايسوي سواياك
كبه وتلقا لك رفيق بديله
تراه مهما جدت له خاب مسعاك
ومن تاه فكره مايفيد الدليله
عليك باللي دوم يحرص على رضاك
قريب لك لو هو بعيد القبيله
احرص عليه وسامك العرش ياقاك
يروف بك عن كل عيله وميله
واليا مشيت اجعل على الحق ممشاك
مايرتفع راع الدجل والختيله
وصلوا على اللي بالهدى زال الاشراك
شفيعنا عن حر جمر المليله
ليست هناك تعليقات:
إرسال تعليق
تذكر!!! تعريفك بنفسك يضمن نشر تعليقك
ملاحظة:
التعليقات الغير معرفة خاضعة لتحرير الإدارة